Rev 10 | BEF | STEP | To amuya'a hiti agelo moneuba kokulumaguti nolimigo bu go'ohuna, Ai ya'ma gufa'aga sopohi giloto mino'ehina. Lataha'alo ya'ma figepa'a besa besa loloto mino'ehina. Okaba'aga yege silikeha'a lolo huto mino'ehina. To gigusa luga luga'a ya'ma lapusa legi huto logo gulu gulu luto loto mino'ehina.

Revelation of John 10

Agelo moneuba pepa nesi'asi kelebe gi'ahana mone lito mino'ehina

1 To amuya'a hiti agelo moneuba kokulumaguti nolimigo bu go'ohuna, Ai ya'ma gufa'aga sopohi giloto mino'ehina. Lataha'alo ya'ma figepa'a besa besa loloto mino'ehina. Okaba'aga yege silikeha'a lolo huto mino'ehina. To gigusa luga luga'a ya'ma lapusa legi huto logo gulu gulu luto loto mino'ehina. 2 Yanugu ya'ma pepa nesi'a mone liloto nohuto ya'ma kelebe gi'ahanaguti litata loloto mino'ehina. Gigusa lamaga'agati ya'ma hege nagami'mofihi gupisa'alo ho tiloto mino'ehina. Gigusa soga'agati metoga liloto mino'ehina. 3 Ya huloto nohigo laeoni yaga nogo'a sipi molo'ehina ya suhi huto ka sipi luto kehe igo kokililika 7 enali ka nona'a sipi li'ahana. 4 Enonogo nemalago keheliloto'ni fayahi kayalube'mu nohugo kokulumaguti nogo'a moneuba katiya'i moneuba ya luto noluto limi'ehina: Kokililika 7 enali kaga li'ahana ya'ma suguna ka ni'igo fayahi mekoyobo. Ya'ma ka fala kito komopakagu mineno.

5 To agelo ya'ma hege nagami'i gupisalo to metoga ho tito mino'ehinauba ai'a yahi lamaga'a kokulumagu li saga huto 6 mone kaga lu molo'ehina. Ya'ma minoba minoba huse bo, kokulumatoga asaga nasana to metoga asaga nasana to hege nagamilugu asaga nasana li huto hu su ho'ehina bo, Hu'mau, ai'a gi'alo kaga'a ya'ma agelouba ma luto kaga molo'ehina: Kana'a mone geba huto meminaluta'mu yabe. 7 Agelo napa 7 ai pikuli fu linogo nogo'a sipi malalube'mu hibe. Ya'ma suguna ka koyapa'i Hu'mau kele kele'amagihi lu huto huto bona'amagihi lu epi'ehinauba ma'asi huto hu su hoto huto hilube'mu hibe luto lu'ehina.

8 Agelo ya luto noligo kokulumaguti nogo'a sipi keheli'ohuna ana huto aku'i huto huloto ma luto lu nimi'ehina: Kai buto agelo hege nagami'i gupisalo to metoga ho tiloto nohina aitogati fayaha pepa kelebe gi'ahana yatoga lita loloto nohina ya'ma libo. 9 Ya luto lulago nani agelo nohinalo buto pepa nesi'a liloto nohina ya'ma nimibo luto lugo ma luto lu nimi'ehina: Liloto nobo ligo nolago luto komopakaluga ekesa'i halube'mu hibe. To lito kabagalo nemeletogo ya'ma upe'i nogoya'a legi huto lagaka kebesilube'mu hibe. 10 Ya luto ligo pepamo ya'ma yatogati lito no'ohuna. Noloto nabagalo ya'ma upe'i nogoya'a ya suhi huto laga gofa hu'ehina. To mikili hogo komopa'niluga ya'ma ekesa ho'ehina.

11 Ya hulago ya'ma luto lu nimi'ehina: Kai bona'magihi li gehesalo silaga'i enugufa'a fato fato'i to melugu bona'i fato fato'i to ka'ani fato fato'i to enikibina bo fato fato'i enali kumu lu yege hose ka mone'a hiti aku'i lubo.